名牌袋 - 你揹唔揹得起?

<互聯網圖片> 作為OL，又以CHANEL Bearbrick做個人照嘅Sweetie，第一篇文章緊要以CHANEL做主題。利申Sweetie一個CHANEL都冇，不過就好鐘意呢個牌子。 早幾日CHANEL大減價，可真令香港女士們茶飯不思。買好？唔買好？但返緊工喎，都係搵唔洗返工嘅朋友幫手買。最後報章刊登咗好多CHANEL大排長龍嘅報導，大搜查式報導幾位女士買咗邊啲心頭好，同埋平咗幾多。 Sweetie雖然貴為中環白領，但返工唔多用名牌，原因係以前喺大大公司做秘書時見得多、聽得多，令到Sweetie有啲怕怕返工用名牌。 話說以前Sweetie做嘅大大公司有好多位秘書小姐，Sweetie就只係一個初踏隻腳入社會嘅細路女。見到前面個秘書姐姐每兩、三個星期就有新款名牌袋。正當Sweetie羨慕之際，就聽到好多聲音喺耳邊。  「 A小姐明明失婚，仲要養一家大細同阿媽，邊有咁多閒錢呀？」「聽講 A小姐同佢嗰組個老闆有路喎，唔怪得咁有米啦。」 「好似話 A小姐因為自己有儲袋癮，同男人一齊嘅目的只係為咗個袋。」 而講呢啲說話正正就係A小姐深交咗好耐嘅老友。雖然我仲未知道A小姐係唔係同佢老闆有一手，但係就知道只要你有野令到其他同事唔抵得，就會一身蟻。 最弊嘅事就係公司大老闆已認定A小姐係賺錢買花戴，A小姐喺年尾加人工嘅時候只係得雞碎咁多。比人講閒話事少，影響份糧就事大啦 ! 呢件事令到Sweetie知道咗個道理，做打工仔最好就要低調，有咩都唔好show off。名牌嘅野，留返星期六日先用吧。 如果你想keep住知道OL每日會發生嘅趣事，就要入去Sweetie個fb page睇下，同like我個page啦! http://bitly.com/OhMySweetie