十大可怕同事

<互聯網圖片> 早幾日登咗一網站文章係講可怕上司12道陰影，Sweetie就有感而發好想講講Sweetie見識過嘅可怕同事，呢啲陋習一啲都唔特別，Sweetie做過咁多間公司都有咁嘅人，今次寫以下呢10個唔知大家有冇遇過呢？ 1. 打噴嚏和咳唔掩嘴 掩嘴是常識吧，有病又唔帶口罩，好似想生化危機咬人變喪屍咁傳染晒成班同事。地鐵都多呢類人，但同事朝見口晚見面，熟人面前都唔避忌下。 2.人地紙巾唔洗錢 好多公司都唔提供面紙比員工，或者只係提供一卷卷廁所紙，所以好多時都係員工自己買。唔知點解有啲同事做咁多年都唔會為自己預備盒紙巾，就算有公司提供嘅一卷卷廁所紙都有事無事抽你幾張，Sweetie自問自己買嘅紙巾唔算薄，一張唔夠用嗎？到你望住佢時，佢至會斯斯然講：借張黎丫。真想反問一句：幾時還呀？呢到係借3張唔係借張。 3. 做幕後黑手 去廁所唔洗手係個好私隱嘅問題，但往往都比Sweetie發現到隔離廁格嘅人沖水後直出廁所大門，洗手嘅水聲呢？又再一次問，如廁後洗手是常識吧！所以Sweetie每次洗完手，都會用一張抺手紙開廁所大門，因為Sweetie知道廁所大門一定沾污晒唔洗手同事嘅細菌。 4. 唔願做包尾 唔知點解Sweetie斟水成日都見到個change bottle燈著咗，影印時又會係用到最後一張紙嘅嗰個。不其然變咗吳若希mode：點解嘅？點解嘅？水都可以解釋個同事至多唔飲走咗去，原來影印同print野都一樣，竟然有次比Sweetie見到個同事見冇紙即去影印機按cancel printing，真想問份文件唔急嘅咩？ 5. 吹多過做 有啲同事好得意，成日周圍同人講自己做緊啲咩大project，個project有幾重要，但往往唔覺佢點洗做野，成日只係拎住個電話由朝到晚同人吹自己擔起幾大嘅重任。就算OT都係吹水唔係做野。 6. 辦公室政治搞手 Sweetie最驚係是非，但office往往係權力鬥爭嘅地方一定會出咗啲辦公室政治搞手。是非精唯恐天下不亂，到處起火頭，見到同事之間鬥到你死我活或大家有心病先覺得自己任務完成，有時Sweetie會諗呢類同事返工嘅正職都底係啲咩呢？ 7. 間歇性失聰 一Team人做野最緊要互相幫助，所以大家幫teammate pick電話係理所當然嘅事。不過有啲同事個世界就永遠只有佢自己嘅電話識響，唔會聽到人地嘅響。扮聽唔到而唔pick都算，有啲仲搞笑地即拎起自己電話打比人。 8. 一日朋友 有啲同事平時冇咩2句，但好奇怪公司加完同事人工或者出完花紅就會同任何同事都好frd咁，其實就係八掛人地出幾多個月花紅，加幾多%人工。到知道人地多過佢就面燶燶，少過佢就開心到掩蓋唔到自己嘅喜悅。 9. 永遠是但，但意見多多 一大班同事難免定時一齊食lunch，諗食咩就最傷頭腦。Sweetie就遇過好多口是心非嘅同事話食咩都冇所謂，到有人提出間餐廳時，就會好多原因話呢樣唔好嗰樣唔好。再問佢又再一次講冇所謂，但人地意見就唔接受，一般大家問到冇癮時，呢類同事就會話：不如去xx食丫。 10.     飯錢慢慢還 出街食lunch唔帶銀包，或者銀包冇錢好多時都會發生喺同事身上，出到聲比住先，冇理由託手踭。一借唔係冇回頭，而係要等1個月有多先會還。同事嘅經濟真係咁割據嗎？有時幾日問一次，每次都話未去ATM拎錢，最怕係1個月後追數時，而佢又唔記得自己係未還，大家為嗰幾十蚊爭執，就有傷感情啦。 如果你想keep住知道OL每日會發生嘅趣事，就要入去Sweetie個fb page睇下，同like我個page啦! http://bitly.com/OhMySweetie