外脆內軟奶油脆豬

奶油脆豬包食得多，但到底邊間做得最好呢? Sweetie最怕某幾間大型茶餐廳焗得太硬，咬嘅時候好容易整損上顎。試過咁多間，發覺「太興」整嘅可能係全港第一，最緊要係佢間間店舖都做得一樣出色，唔會品質唔同。為食Sweetie通常都會叫個下午茶餐，$33蚊有奶油脆豬包再加個冰鎮奶茶，食完呢個set下午就會好滿足。

太興奶油脆豬包外脆內軟，牛油奶油份量剛剛好，細心分成4份方便入口。順便講埋個冰鎮奶茶，茶香奶滑，冰鎮方式唔怕變暖。同場加映奶油花生醬多士，感覺唔錯，不過都係冇奶油脆豬包做得咁出色突出，所以建議大家都係食奶油脆豬包比較好。另外仲有個棉花糖多士，好特別但Sweetie未試。太興近期致力研發新食物，好似罐裝咖哩、牛腩及羅宋湯等。平時太興燒味已經得到好高評價，小菜又係無飯家庭嘅至愛。Sweetie仲發現原來最鐘意食嘅台式餐廳TEA WOOD茶木都係太興品牌，太興呢個品牌真係冇得輸。

Facebook專頁有更多其他資訊，

請給Sweetie page一個like以示支持，謝謝:)

http://bitly.com/OhMySweetie

米芝蓮推介生煎包

Sweetie好鐘意食生煎包，成日都周圍搵生煎包食，祥興記上海生煎包早前拎到米芝蓮小食推介，當然要去試試。而家尖沙咀開埋分店，坐地鐵過海一個站就到，岩晒Sweetie呢個港島區人。

尖沙咀分店舖細細，成個舖做咗廚房，只係有一邊對馬路位整咗張長型酒吧枱5張凳做堂食。7-8點一般人都會食晚飯好少可會買小食，Sweetie買時都見到有5-6個人排隊外賣(影相時得返2個)，堂食都有6個人圍，加上一邊煎一邊賣人流去得快，睇黎生意算唔錯。

生煎包$28有4個，size如2隻疊埋嘅小籠包般大，所以女仔黎講食4個都夠飽肚。外賣會放入印有祥興記封面紙盒，店員刻意唔封實個盒入膠袋，可能擔心水氣整濕個煎皮部份影響脆嘅程度。最窩心係唔洗開口問，每包外賣一定配一對埋筷子同埋一盒仔醋。

生煎包面上有黑白芝麻蔥碎粒，底部煎到金黃色。一咬爆晒裡面肉汁，肉汁多到懷疑係灌湯形式去做。肉質新鮮，有豬肉味，Juicy唔過熟，相比起其他店生煎包嘅肉係最出色。Sweetie整體比80分，20失分喺生煎包的皮似窩貼皮唔似麵包皮，Sweetie個人比較鐘意真正嘅包，因為而家感覺似食窩貼多。另外底部煎嘅部份過咗火，有啲硬，呢點上海綠楊邨酒家做得比軟好。不過始終冇兩全其美，因為如果用包去做，應該做唔到灌湯嘅效果。

$28試到米芝蓮推介小食，仲唔快啲去試下。

如果你想keep住知道OL每日會發生嘅趣事，就要入去Sweetie個fb page睇下，同like我個page啦!

http://bitly.com/OhMySweetie