化身經典遊戲主角 - 食鬼

如果你呢排諗住同三五知己喺星期六、日gathering諗節目，唔洗頭痛，因為由26/9至1/11嘅每逄星期六、日，喺山頂廣場有個AAPE x PAC-MAN 迷宮，遊戲名叫Running Pac-Man，另外仲會喺萬聖節前一晚的星期五30/10加推多一日。PAC-MAN(食鬼)可以話係大家嘅集體回憶，難得有佢嘅主題活動，Sweetie當然親身玩完再滙報比大家知。 只要而家喺山頂廣場消費滿$100，就會有一張入場券，如此類推，最多可以換4張，因為一場GAME最多得3隻鬼同1隻PAC-MAN架咋。但要留意，以上嘅消費都係最多以2張單計算。山頂冇野好買？Sweetie比個小貼事你~去百佳買啲日用品就消費得黎唔浪費啦。 遊戲玩法4人一場GAME，但如果真係唔夠人，工作人員都可以同你玩埋一份。大家會以抽籤形式決定做咩角色。當日Sweetie就做咗最想做嘅PAC-MAN，朋友們就做咗鬼。唔好以為PAC-MAN好易做，因為個頭盔都幾重架。而鬼一樣更加唔易做，聽朋友講穿咗個吹氣鬼罩，感覺好似潛咗水睇野好唔清楚。   遊戲一開始鬼係可以食PAC-MAN，但如果PAC-MAN喺地下踩中個AAPE標誌嘅大力丸，PAC-MAN就可以倒捉返鬼架啦。最後遊戲勝出者仲會有PAC-MAN USB 一隻做獎品，而輸咗嘅參加者亦都會有AAPE x PAC-MAN糖果一包，皆大歡喜。   小朋友玩唔到唔緊要，因為商場仲有個PAC-MAN小迷宮場地比佢地玩。另外成個商場仲有好多食鬼嘅公仔比大家影相集郵添。要玩就快啦，到11月1號咋。 山頂廣場Website: http://www.thepeakgalleria.com/zh-HK/promotions/event-and-promotion.aspx 如果你想keep住知道OL Sweetie分享嘅事，請like我個page啦!  http://bitly.com/OhMySweetie